Hay’adda Danwadaag Oo Deeq Raashin ah Gaarsiisay Xerada Qaxootiga Boqolka Buush ee Boosaaso

Hay’adda Danwadag Relief And Development Organization oo ah hay’ad samafal oo  fadhigeeduna yahay magaalada Leicester ee dalka Ingiriiska ayaa dhowaantan deeq Raashin ah gaarsiisay qoysas Qaxooti ah oo degan magaalada Boosaaso gaar ahaana xaafada loo yaqaano Boqolka Buush oo ay ku noolyihiin ku dhowaad 200 qoys.

Hay’addan ayaa gaarsiisay deeq Raashin ah oo isugu jiray Bur iyo Bariis iyadoo wakiilka hay’addan ee Danwadaag ee dalka Soomaaliya Maxamuud Max’ed Xaaji oo halkaasi tegay uu ka qeyb qaatay qeybinta raashinkaasi, waxayna dadkii Raashinkaasi nasiibka u helay ka mahad celiyeen deeqdan oo ay sheegeen inay soo gaartay xilli ay u baahnaayeen kaalmo, laguna jiro bisha Barakeysan ee Ramadaanka.

Xaaji C/dalla Siciid oo ka mid ahaa odayaasha degan xaafada Boqolka Buush ayaa uga mahad celiyay deeqdan hay’adda Danwadaag. isagoo sheegay inay tahay hay’addan deeqdan soo gaarsiisay waqti wanaagsan “Deeqdan waxay na soo gaartay xilli aan u baahneyn, waxaana xaafada ka jirtay duruufo dhinaca Afurka ah, waxaana u mahad celineynaa dhamaan mas’uuliyiinta hay’addan” ayuu yiri Xaaji C/dalla oo ugu baaqay hay’adda inay sii laban laabto kaalmadooda balse aysan intan ugu ekeynin.

Waxay aheyd horaanta bishii October markii ay kaalmo gaarsiisay  Hay’adda Danwadaag Relief And Development Organizatoin qaar ka mid ah gobolada dalka Soomaaliya gaar ahaana kuwa maamul goboleedka Puntland iyadoo ay ku deeqday qalab waxbarasho oo isugu jiray Buugaag iyo Qalmaan taasoo ay guddoonsiisay maamulada dugsiyada Hoose iyo dhexe oo ku yaala Waqooyiga Gaalkacyo iyo degmada Bacaadweyn. 

By: - Cabdixakiim Jaamac Jooje

Leicester UK.